Акафист святителю Николаю на церковнославянском

Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆́кїи тѧ ста́дꙋ твоемꙋ̀ ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога́таѧ: ѻ҆́тче свѧщеннонача́льниче нїко́лае, молѝ хрⷭ҇та̀ бг҃а, спасти́сѧ дꙋша́мъ на́шымъ.

Возбра́нный чꙋдотво́рче, и҆ и҆зрѧдный ᲂу҆го́дниче хрⷭ҇то́въ, мірꙋ всемꙋ̀ и҆сточа́ѧй многоцѣ́нное млⷭ҇ти мѵ́ро, и҆ неисчерпа́емое чꙋде́съ мо́ре, восхвалѧю тѧ̀ любо́вїю, ст҃и́телю нїко́лае: ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧкихъ мѧ̀ бѣ́дъ свободѝ, да зовꙋ́ ти:

Ра́дꙋйсѧ, нїко́лае, вели́кїй чꙋдотво́рче.

А҆́ггла ѡ҆́бразомъ, земна́го сꙋ́ща є҆стество́мъ, ꙗвѝ тебѐ всеѧ̀ тва́ри созда́тель: бл҃гопло́днꙋю бо добро́тꙋ дꙋшѝ твоеѧ̀ прови́дѣвъ, пребл҃же́нне нїко́лае, наꙋчѝ всѣхъ вопи́ти тебѣ̀ си́це:

Ра́дꙋйсѧ, ѿ ᲂу҆тро́бы ма́тернїѧ ѡ҆чище́нный:

Ра́дꙋйсѧ, да́же до конца̀ ѡ҆сщ҃е́нный.

Ра́дꙋйсѧ, рожде́нїемъ свои́мъ роди́телей ᲂу҆диви́вый:

Ра́дꙋйсѧ, си́лꙋ дꙋше́внꙋю а҆́бїе по рождествѣ̀ ꙗ҆́кїивый.

Ра́дꙋйсѧ, са́де землѝ ѡ҆бѣтова́нїѧ:

Ра́дꙋйсѧ, цвѣ́те бжⷭ҇твеннагѡ сажде́нїѧ.

Ра́дꙋйсѧ, лозо̀ добродѣ́тельнаѧ віногра́да хрⷭ҇то́ва:

Ра́дꙋйсѧ, дре́во чꙋдото́чное раѧ̀ і҆и҃сова.

Ра́дꙋйсѧ, кріне ра́йскагѡ прозѧбе́нїѧ:

Ра́дꙋйсѧ, мѵ́ро хрⷭ҇то́ва бл҃гоꙋха́нїѧ.

Ра́дꙋйсѧ, ꙗ҆́кѡ тобо́ю ѿго́нитсѧ рыда́нїе:

Ра́дꙋйсѧ, ꙗ҆́кѡ тобо́ю прино́ситсѧ ра́дованїе.

Ра́дꙋйсѧ, нїко́лае, вели́кїй чꙋдотво́рче.

Ви́дѧще твои́хъ мѵ́ръ и҆зліѧнїе, бг҃омꙋ́дре, просвѣща́емсѧ дꙋша́ми и҆ тѣлесы̀, ди́внагѡ тѧ̀ ммрото́чца живоно́сна, нїко́лае, разꙋмѣ́юще: чꙋдесы́ бо, ꙗ҆́кѡ вода́ми, бл҃года́тїю бж҃їею и҆злива́ющимисѧ, напаѧеши вѣ́рнѡ вопїю́щихъ бг҃ꙋ: А҆ллилꙋ́їа.

Ра́зꙋмъ неꙋразꙋмѣ́нный вразꙋмлѧ́ѧ ѡ҆ ст҃ѣ́й трⷪ҇цѣ, бы́лъ є҆сѝ въ ніке́и со ст҃ы́ми ѻ҆тцы̀ побо́рникъ и҆сповѣ́данїѧ правосла́вныѧ вѣ́ры: ра́вна бо ѻ҆ц҃ꙋ̀ сн҃а и҆сповѣ́далъ є҆сѝ, соприсносꙋ́щна и҆ сопресто́льна, а҆́рїа же безꙋ́мнаго ѡ҆бличи́лъ є҆сѝ. Сегѡ̀ ра́ди вѣ́рнїи наꙋчи́шасѧ воспѣва́ти тебѣ̀:

Ра́дꙋйсѧ, вели́кїй бл҃гоче́стїѧ сто́лпе:

Ра́дꙋйсѧ, вѣ́рныхъ прибѣ́жища гра́де.

Ра́дꙋйсѧ, тве́рдое правосла́вїѧ ᲂу҆крѣпле́нїе:

Ра́дꙋйсѧ, чⷭ҇тно́е прест҃ы́ѧ трⷪ҇цы носи́ло и҆ похвале́нїе.

Ра́дꙋйсѧ, ѻ҆ц҃ꙋ̀ равноче́стна сн҃а проповѣ́давый:

Ра́дꙋйсѧ, а҆́рїа возбѣси́вшагосѧ ѿ собо́ра ст҃ы́хъ ѿгна́вый.

Ра́дꙋйсѧ, ѻ҆́тче, ѻ҆тцє́въ сла́внаѧ красото̀:

Ра́дꙋйсѧ, всѣхъ бг҃омꙋ́дрыхъ премꙋ́драѧ добро́то.

Ра́дꙋйсѧ, ѻ҆́гнєннаѧ словеса̀ и҆спꙋща́ѧй:

Ра́дꙋйсѧ, до́брѣ ста́до своѐ наставлѧ́ѧй.

Ра́дꙋйсѧ, ꙗ҆́кѡ тобо́ю вѣ́ра ᲂу҆твержда́етсѧ:

Ра́дꙋйсѧ, ꙗ҆́кѡ тобо́ю є҆́ресь низлага́етсѧ.

Ра́дꙋйсѧ, нїко́лае, вели́кїй чꙋдотво́рче.

Си́лою да́нною тѝ свы́ше, сле́зꙋ всѧкꙋ ѿѧлъ є҆сѝ ѿ лица̀ лю́тѣ стра́ждꙋщихъ, бг҃оно́се ѻ҆́тче нїко́лае: а҆́лчꙋщымъ бо ꙗ҆́кїилсѧ є҆сѝ корми́тель, въ пꙋчи́нѣ морстѣ́й сꙋ́щымъ и҆зрѧдный прави́тель, недꙋ́гꙋющымъ и҆сцѣле́нїе, и҆ всѣ́мъ всѧкъ помо́щникъ показа́лсѧ є҆сѝ, вопїю́щымъ бг҃ꙋ: А҆ллилꙋ́їа.

И҆мѣ́ѧше вои́стиннꙋ, ѻ҆́тче нїко́лае, съ нб҃сѐ пѣ́снь тебѣ̀ воспѣва́ема бы́ти, а҆ не ѿ землѝ: ка́кѡ бо кто̀ ѿ человѣ́къ возмо́жетъ твоеѧ̀ ст҃ы́ни вели́чїѧ проповѣ́дати; но мы̀ любо́вїю твое́ю побѣжда́еми, вопіе́мъ тѝ си́це:

Ра́дꙋйсѧ, ѡ҆́бразе а҆́гнцєвъ и҆ па́стырей:

Ра́дꙋйсѧ, ст҃о́е ѡ҆чисти́лище нра́вѡвъ.

Ра́дꙋйсѧ, добродѣ́телей вели́кихъ вмѣсти́лище:

Ра́дꙋйсѧ, ст҃ы́ни чи́стое и҆ честно́е жили́ще.

Ра́дꙋйсѧ, свѣти́льниче всесвѣ́тлый и҆ вселюби́мый:

Ра́дꙋйсѧ, свѣ́те златоза́рный и҆ непоро́чный.

Ра́дꙋйсѧ, досто́йный а҆́гглѡвъ собесѣ́дниче:

Ра́дꙋйсѧ, до́брый человѣ́кѡвъ наста́вниче.

Ра́дꙋйсѧ, пра́вило вѣ́ры бл҃гочести́выѧ:

Ра́дꙋйсѧ, ѡ҆́бразе кро́тости дꙋхо́вныѧ.

Ра́дꙋйсѧ, ꙗ҆́кѡ тобо́ю ѿ страсте́й тѣле́сныхъ и҆збавлѧемсѧ:

Ра́дꙋйсѧ, ꙗ҆́кѡ тобо́ю сла́достей дх҃о́вныхъ и҆сполнѧемсѧ.

Ра́дꙋйсѧ, нїко́лае, вели́кїй чꙋдотво́рче.

Бꙋ́рѧ недоꙋмѣ́нїѧ смꙋща́етъ мѝ ᲂу҆́мъ, ка́кѡ досто́йно є҆́сть пѣ́ти чꙋдеса̀ твоѧ̀, бл҃же́нне нїко́лае; никто́же бо мо́жетъ ѧ҆ и҆счестѝ, а҆́ще бы и҆ мно́ги ѧ҆зы́ки и҆мѣ́лъ, и҆ глаго́лати восхотѣ́лъ. Но мы̀ ди́внѡ бг҃ꙋ въ тебѣ̀ прославлѧющемꙋсѧ, дерза́емъ воспѣва́ти: А҆ллилꙋ́їа.

Слы́шаша, бг҃омꙋ́дре нїко́лае, бли́жнїи и҆ да́льнїи вели́чїе чꙋде́съ твои́хъ, ꙗ҆́кѡ по воздꙋ́хꙋ ле́гкими бл҃года́тными крила́ми навы́клъ є҆сѝ сꙋ́щихъ въ бѣда́хъ предварѧти, ско́рѡ ѿ тѣ́хъ и҆збавлѧ́ѧ всѣхъ вопїю́щихъ къ тебѣ̀ такѡва́ѧ:

Ра́дꙋйсѧ, и҆збавле́нїе ѿ печа́ли:

Ра́дꙋйсѧ, подаѧнїе бл҃года́ти.

Ра́дꙋйсѧ, неча́емыхъ ѕѡ́лъ прогони́телю:

Ра́дꙋйсѧ, жела́емыхъ бл҃ги́хъ насади́телю.

Ра́дꙋйсѧ, ско́рый ᲂу҆тѣ́шителю въ бѣдѣ̀ сꙋ́щихъ:

Ра́дꙋйсѧ, стра́шный наказа́телю ѡ҆би́дѧщихъ.

Ра́дꙋйсѧ, чꙋде́съ пꙋчи́но бг҃омъ и҆зліѧннаѧ:

Ра́дꙋйсѧ, зако́на хрⷭ҇то́ва скрижа̑ли бг҃омъ пи́санныѧ.

Ра́дꙋйсѧ, крѣ́пкое па́дающихъ возведе́нїе:

Ра́дꙋйсѧ, пра́вѡ стоѧщихъ ᲂу҆твержде́нїе.

Ра́дꙋйсѧ, ꙗ҆́кѡ тобо́ю всѧкаѧ ле́сть ѡ҆бнажа́етсѧ:

Ра́дꙋйсѧ, ꙗ҆́кѡ тобо́ю всѧкаѧ и҆́стина сбыва́етсѧ.

Ра́дꙋйсѧ, нїко́лае, вели́кїй чꙋдотво́рче.

Бг҃оте́чнаѧ ѕвѣзда̀ ꙗ҆́кїилсѧ є҆сѝ, наставлѧ́ѧ по мо́рю пла́вающихъ лю́тѣ, и҆́мже сме́рть предстоѧше вско́рѣ и҆ногда̀, а҆́ще не бы̀ ты̀ предста́лъ є҆сѝ призыва́ющымъ тѧ̀ въ по́мощь, чꙋдотво́рче ст҃ы́й нїко́лае: ᲂу҆же́ бо несты́днѡ бѣсѡ́мъ лета́ющымъ, и҆ погрꙋзи́ти кораблѝ хотѧщымъ запрети́въ, ѿгна́лъ є҆сѝ и҆́хъ, вѣ́рныѧ же наꙋчи́лъ є҆сѝ сп҃са́ющемꙋ тобо́ю бг҃ꙋ взыва́ти: А҆ллилꙋ́їа.

Ви́дѣша ѻ҆трокови́цы, на бра́къ скве́рный нищеты̀ ра́ди ᲂу҆готѡ́ванныѧ, вели́кое твоѐ къ ни́щымъ млⷭ҇рдїе, пребл҃же́нне ѻ҆́тче нїко́лае, є҆гда̀ ста́рцꙋ роди́телю и҆́хъ но́щїю ᲂу҆зельцы̀ трѝ зла́та таѧсѧ по́далъ є҆сѝ, самаго̀ со дще́рьми и҆збавлѧ́ѧ ѿ паде́нїѧ грѣхо́внагѡ. Тогѡ̀ ра́ди слы́шиши ѿ всѣхъ си́це:

Ра́дꙋйсѧ, млⷭ҇ти превели́кїѧ сокро́вище:

Ра́дꙋйсѧ, промышле́нїѧ ѡ҆ лю́дехъ прїѧтелище.

Ра́дꙋйсѧ, пи́ще и҆ ѿра́до къ тебѣ̀ прибѣга́ющихъ:

Ра́дꙋйсѧ, хлѣ́бе неснѣда́емый а҆́лчꙋщихъ.

Ра́дꙋйсѧ, бога́тство бѣ́днѣ живꙋ́щымъ на землѝ бг҃омъ да́нное:

Ра́дꙋйсѧ, воздви́женїе ско́рое ᲂу҆бо́гихъ.

Ра́дꙋйсѧ, бы́строе ни́щихъ ᲂу҆слы́шанїе:

Ра́дꙋйсѧ, скорбѧщихъ прїѧтное попече́нїе.

Ра́дꙋйсѧ, тріе́хъ дѣ́въ непоро́чный невѣсти́телю:

Ра́дꙋйсѧ, чистоты̀ ᲂу҆се́рдный храни́телю.

Ра́дꙋйсѧ, ненаде́жныхъ надѣ́ѧнїе:

Ра́дꙋйсѧ, всегѡ̀ міра наслажде́нїе.

Ра́дꙋйсѧ, нїко́лае, вели́кїй чꙋдотво́рче.

Проповѣ́дꙋетъ міръ ве́сь тебѐ, пребл҃же́нне нїко́лае, ско́раго въ бѣда́хъ застꙋ́пника: ꙗ҆́кѡ мно́гажды во є҆ди́номъ часѣ̀, по землѝ пꙋтеше́ствꙋющымъ, и҆ по мо́рю пла́вающымъ, предварѧѧ посо́бствꙋеши, кꙋ́пнѡ всѣхъ ѿ ѕлы́хъ сохранѧѧ, вопїю́щихъ къ бг҃ꙋ: А҆ллилꙋ́їа.

Возсіѧлъ є҆сѝ свѣ́тъ живо́тный, и҆збавле́нїе носѧ̀ воево́дамъ, непра́веднꙋю сме́рть прїѧти и҆мꙋ́щымъ, тебѐ до́брый па́стырю нїко́лае, призыва́ющымъ, є҆гда̀ вско́рѣ ꙗ҆́вльсѧ во снѣ̀ царе́ви, ᲂу҆страши́лъ є҆сѝ є҆гѡ̀, си́хъ же неврежде́нныхъ ѿпꙋсти́ти повелѣ́лъ є҆сѝ. Сегѡ̀ ра́ди съ ни́ми кꙋ́пнѡ и҆ мы̀ бл҃года́рственнѡ вопіе́мъ тѝ:

Ра́дꙋйсѧ, ᲂу҆се́рднѡ призыва́ющымъ тѧ̀ помога́ѧй:

Ра́дꙋйсѧ, ѿ непра́веднагѡ ᲂу҆біе́нїѧ и҆збавлѧ́ѧй.

Ра́дꙋйсѧ, ѿ ле́стныѧ сохранѧѧй клеветы̀:

Ра́дꙋйсѧ, непра́вєдныѧ разрꙋша́ѧй совѣ́ты.

Ра́дꙋйсѧ, растерза́ѧй лжꙋ̀ ꙗ҆́кѡ паꙋчи́нꙋ:

Ра́дꙋйсѧ, возноша́ѧй сла́внѡ и҆́стинꙋ.

Ра́дꙋйсѧ, непови́нныхъ ѿ ᲂу҆́зъ разрѣше́нїе:

Ра́дꙋйсѧ, и҆ мертвецє́въ ѡ҆живле́нїе.

Ра́дꙋйсѧ, проѧви́телю пра́вды:

Ра́дꙋйсѧ, помрачи́телю непра́вды.

Ра́дꙋйсѧ, ꙗ҆́кѡ тобо́ю непови́ннїи и҆зба́влени ѿ меча̀:

Ра́дꙋйсѧ, ꙗ҆́кѡ тобо́ю наслади́шасѧ свѣ́та.

Ра́дꙋйсѧ, нїко́лае, вели́кїй чꙋдотво́рче.

Хотѧ̀ богохꙋ́льное є҆ретіческое ѿгна́ти ѕлосмра́дїе, мѵ́ро вои́стиннꙋ бл҃гово́нное та́инственное ꙗ҆́кїилсѧ є҆сѝ нїко́лае: лю́ди ммрє́йскїѧ ᲂу҆па́слъ є҆сѝ, и҆ ве́сь міръ свои́мъ бл҃года́тнымъ мѵ́ромъ и҆спо́лнилъ є҆сѝ: и҆ ѿ на́съ ᲂꙋ҆́бо богоме́рзкое грѣхо́вное ѕлосмра́дїе ѿженѝ, да бл҃гопрїѧтнѡ бг҃ꙋ вопіе́мъ: А҆ллилꙋ́їа.

Но́ваго тѧ̀ нѡ́а, наста́вника ковче́га сп҃си́тельнагѡ разꙋмѣ́емъ, ѻ҆́тче ст҃ы́й нїко́лае, бꙋ́рю всѣхъ лю́тыхъ разгонѧющаго направле́нїемъ свои́мъ, тишинꙋ́ же бжⷭ҇твеннꙋю приносѧщаго вопїю́щымъ такѡва́ѧ:

Ра́дꙋйсѧ, ѡ҆бꙋрева́емыхъ ти́хое приста́нище:

Ра́дꙋйсѧ, ᲂу҆топа́ющихъ и҆звѣ́стное храни́лище.

Ра́дꙋйсѧ, пла́вающихъ посредѣ̀ пꙋчи́нъ до́брый ко́рмчїй:

Ра́дꙋйсѧ, треволнє́нїѧ морска̑ѧ ᲂу҆ставлѧющїй.

Ра́дꙋйсѧ, превожде́нїе сꙋ́щихъ въ ви́хрѣхъ:

Ра́дꙋйсѧ, согрѣ́ѧнїе сꙋ́щихъ во мра́зѣхъ.

Ра́дꙋйсѧ, сіѧнїе, ско́рбный мра́къ разгонѧющее:

Ра́дꙋйсѧ, свѣти́ло, всѧ̀ концы̀ землѝ просвѣща́ющее.

Ра́дꙋйсѧ, ѿ бе́здны грѣхо́вныѧ человѣ́ки и҆збавлѧ́ѧй:

Ра́дꙋйсѧ, въ бе́зднꙋ а҆́дскꙋю сатанꙋ̀ вверга́ѧй.

Ра́дꙋйсѧ, ꙗ҆́кѡ тобо́ю дерзнове́ннѡ бе́зднꙋ млⷭ҇рдїѧ бж҃їѧ призыва́емъ:

Ра́дꙋйсѧ, ꙗ҆́кѡ тобо́ю ѿ пото́па гнѣ́ва и҆зба́вльшесѧ, ми́ръ съ бг҃омъ ѡ҆брѣта́емъ.

Ра́дꙋйсѧ, нїко́лае, вели́кїй чꙋдотво́рче.

Стра́нное чꙋ́до ꙗвлѧетсѧ притека́ющымъ къ тебѣ̀, бл҃же́нне нїко́лае, сщ҃е́ннаѧ твоѧ̀ це́рковь: въ не́й бо и҆ ма́лое моле́нїе приносѧще, ве́лїихъ недꙋ́гѡвъ пріе́млемъ и҆сцѣле́нїе, а҆́ще то́кмѡ по бз҃ѣ ᲂу҆пова́нїе на тѧ̀ возложи́мъ, вѣ́рнѡ вопїю́ще: А҆ллилꙋ́їа.

Ве́сь є҆сѝ всѣ́мъ вои́стиннꙋ помо́щникъ, бг҃оно́се нїко́лае, и҆ собра́лъ є҆сѝ вкꙋ́пѣ всѧ̀ прибѣга́ющыѧ къ тебѣ̀, ꙗ҆́кѡ свободи́тель, пита́тель, и҆ вра́чь ско́рый всѣ́мъ земны́мъ, на похвалꙋ̀ всѣхъ воздвиза́ѧ, вопи́ти къ тебѣ̀ си́це:

Ра́дꙋйсѧ, всѧкихъ и҆сцѣле́нїй и҆сто́чниче:

Ра́дꙋйсѧ, лю́тѣ стра́ждꙋщымъ помо́щниче.

Ра́дꙋйсѧ, зарѐ, сіѧющаѧ въ нощѝ грѣхо́внѣй блꙋжда́ющымъ:

Ра́дꙋйсѧ, росо̀ небото́чнаѧ въ зно́и трꙋдѡ́въ сꙋ́щымъ.

Ра́дꙋйсѧ, подава́ѧй тре́бꙋющымъ бл҃гострое́нїе:

Ра́дꙋйсѧ, ᲂу҆готовлѧ́ѧй просѧщымъ и҆зъoби́лїе.

Ра́дꙋйсѧ, мно́гажды проше́нїе предварѧѧй:

Ра́дꙋйсѧ, ста̑рымъ сѣди́намъ си́лꙋ ѡ҆бновлѧ́ѧй.

Ра́дꙋйсѧ, мно́гихъ заблꙋжде́нїй ѿ пꙋтѝ и҆́стиннагѡ ѡ҆бличи́телю:

Ра́дꙋйсѧ, та̑инъ бж҃їихъ вѣ́рный слꙋжи́телю.

Ра́дꙋйсѧ, ꙗ҆́кѡ тобо́ю за́висть попира́емъ:

Ра́дꙋйсѧ, ꙗ҆́кѡ тобо́ю бл҃гонра́вное житіѐ и҆справлѧемъ.

Ра́дꙋйсѧ, нїко́лае, вели́кїй чꙋдотво́рче.

Всѧ̀кїѧ ᲂу҆толѝ болѣ́зни, вели́кїй на́шъ застꙋ́пниче нїко́лае, растворѧѧ бл҃года̑тнаѧ врачева̑нїѧ, ᲂу҆слажда̑ющаѧ дꙋ́шы на́шѧ, сердца́ же веселѧщаѧ, всѣхъ ᲂу҆се́рднѡ къ по́мощи твое́й притека́ющихъ, бг҃ꙋ же вопїю́щихъ: А҆ллилꙋ́їа.

Вѣтї́ѧ сꙋемꙋ́дрєнныѧ нечести́выхъ ви́димъ тобо́ю посра́млєнныѧ, бг҃омꙋ́дре ѻ҆́тче нїко́лае: а҆́рїа бо хꙋ́льника раздѣлѧюща бж҃ество̀, и҆ саве́ллїа смѣша́юща ст҃ꙋ́ю трⷪ҇цꙋ, препрѣ́хъ, на́съ же во правосла́вїи ᲂу҆крѣпи́лъ є҆сѝ. Сегѡ̀ ра́ди вопіе́мъ тѝ си́це:

Ра́дꙋйсѧ, щи́те, защища́ѧй бл҃гоче́стїе:

Ра́дꙋйсѧ, мечꙋ̀, посѣца́ѧй ѕлоче́стїе.

Ра́дꙋйсѧ, ᲂу҆чи́телю бжⷭ҇твенныхъ велѣ́нїй:

Ра́дꙋйсѧ, гꙋби́телю бг҃опроти́вныхъ ᲂу҆че́нїй.

Ра́дꙋйсѧ, лѣ́ствице бг҃омъ ᲂу҆твержде́ннаѧ, є҆́юже восхо́димъ къ нб҃сѝ:

Ра́дꙋйсѧ, покро́ве бг҃омъ зда́нный, и҆́мже покрыва́ютсѧ мно́зи.

Ра́дꙋйсѧ, немꙋ́дрыхъ ᲂу҆мꙋдри́вый твои́ми словесы̀:

Ра́дꙋйсѧ, лѣни́выхъ подви́гнꙋвый твои́ми нра́вы.

Ра́дꙋйсѧ, свѣ́тлосте за́повѣдей бж҃їихъ неꙋгаси́маѧ:

Ра́дꙋйсѧ, лꙋчѐ ѡ҆правда́нїй гдⷭ҇нихъ пресвѣ́тлаѧ.

Ра́дꙋйсѧ, ꙗ҆́кѡ ᲂу҆че́нїемъ твои́мъ сокрꙋша́ютсѧ є҆ретічєскїѧ главы́:

Ра́дꙋйсѧ, ꙗ҆́кѡ тобо́ю вѣ́рнїи сподоблѧютсѧ сла́вы.

Ра́дꙋйсѧ, нїко́лае, вели́кїй чꙋдотво́рче.

Сп҃стѝ хотѧ̀ дꙋ́шꙋ, пло́ть твою̀ дꙋ́хови покори́лъ є҆сѝ вои́стиннꙋ, ѻ҆́тче на́шъ нїко́лае: молча́ньми бо пре́жде и҆ боре́ньми съ по́мыслы, дѣѧнїю бг҃омы́слїе приложи́лъ є҆сѝ, бг҃омы́слїемъ же ра́зꙋмъ соверше́нъ стѧжа́лъ є҆сѝ, и҆́мже дерзнове́ннѡ съ бг҃омъ и҆ а҆́гглы бесѣ́довалъ є҆сѝ, всегда̀ вопіѧ̀: А҆ллилꙋ́їа.

Стѣна̀ є҆сѝ похвалѧющымъ, пребл҃же́нне, чꙋдеса̀ твоѧ̀, и҆ всѣ́мъ къ застꙋпле́нїю твоемꙋ̀ прибѣга́ющымъ: тѣ́мже и҆ на́съ въ добродѣ́тели ᲂу҆бо́гихъ, ѿ нищеты̀, напа́сти, недꙋ́гѡвъ и҆ нꙋ́ждъ разли́чныхъ свобожда́й, вопїю́щихъ тѝ съ любо́вїю такѡва́ѧ:

Ра́дꙋйсѧ, ѿ ᲂу҆бо́жества вѣ́чнагѡ и҆зъима́ѧй:

Ра́дꙋйсѧ, бога́тство нетлѣ́нное подава́ѧй.

Ра́дꙋйсѧ, бра́шно неги́блющее а҆́лчꙋщымъ пра́вды:

Ра́дꙋйсѧ, питіѐ неисчерпа́емое жа́ждꙋщымъ жи́зни.

Ра́дꙋйсѧ, ѿ мѧте́жа и҆ бра́ни соблюда́ѧй:

Ра́дꙋйсѧ, ѿ ᲂу҆́зъ и҆ плѣне́нїѧ свобожда́ѧй.

Ра́дꙋйсѧ, пресла́вный въ бѣда́хъ застꙋ́пниче:

Ра́дꙋйсѧ, превели́кїй въ напа́стехъ защи́тниче.

Ра́дꙋйсѧ, мно́гихъ ѿ поги́бели и҆схи́тивый:

Ра́дꙋйсѧ, безчи́сленныхъ неврежде́ннѡ сохрани́вый.

Ра́дꙋйсѧ, ꙗ҆́кѡ тобо́ю лю́тыѧ сме́рти грѣ́шнїи и҆збѣга́ютъ:

Ра́дꙋйсѧ, ꙗ҆́кѡ тобо́ю жи́знь вѣ́чнꙋю ка́ющїисѧ полꙋча́ютъ.

Ра́дꙋйсѧ, нїко́лае, вели́кїй чꙋдотво́рче.

Пѣ́нїе прест҃ѣ́й трⷪ҇цѣ па́че и҆ны́хъ прине́слъ є҆сѝ, пребл҃же́нне нїко́лае, ᲂу҆мо́мъ, сло́вомъ и҆ дѣ́ломъ: мно́гимъ бо и҆спыта́нїемъ правовѣ́рнаѧ повелѣ́нїѧ ᲂу҆ѧсни́лъ є҆сѝ, вѣ́рою, наде́ждою и҆ любо́вїю наставлѧ́ѧ на́съ въ трⷪ҇цѣ є҆ди́номꙋ бг҃ꙋ воспѣва́ти: А҆ллилꙋ́їа.

Свѣтоза́рнꙋю лꙋчꙋ̀ во мра́цѣ житіѧ̀ сꙋ́щымъ неꙋгаси́мꙋю, ви́димъ тѧ̀, бг҃омъ и҆збра́нне ѻ҆́тче нїко́лае: съ невеще́ственными бо а҆́ггльскими свѣ́ты, бесѣ́дꙋеши ѡ҆ несозда́нномъ трⷪ҇ческомъ свѣ́тѣ, вѣ́рныхъ же дꙋ́шы просвѣща́еши, вопїю́щихъ тѝ такѡва́ѧ:

Ра́дꙋйсѧ, ѡ҆заре́нїе трисо́лнечнагѡ свѣ́та:

Ра́дꙋйсѧ, денни́це незаходи́магѡ сл҃нца.

Ра́дꙋйсѧ, свѣщѐ, бжⷭ҇твеннымъ пла́менемъ возжже́ннаѧ:

Ра́дꙋйсѧ, ꙗ҆́кѡ ᲂу҆гаси́лъ є҆сѝ бѣсо́вскїй пла́мень нече́стїѧ.

Ра́дꙋйсѧ, свѣ́тлое правовѣ́рїѧ проповѣ́данїе:

Ра́дꙋйсѧ, доброзра́чное свѣ́та є҆ѵльскагѡ сіѧнїе.

Ра́дꙋйсѧ, мо́лнїе, є҆́рєси пожига́ющаѧ:

Ра́дꙋйсѧ, гро́ме, ᲂу҆страша́ющїй соблазнѧющыѧ.

Ра́дꙋйсѧ, и҆́стиннагѡ наꙋчи́телю ра́зꙋма:

Ра́дꙋйсѧ, та́инственнагѡ и҆зъѧви́телю ᲂу҆ма̀.

Ра́дꙋйсѧ, ꙗ҆́кѡ тобо́ю попра́сѧ поклоне́нїе тва́ри:

Ра́дꙋйсѧ, ꙗ҆́кѡ тобо́ю наꙋчи́хомсѧ покланѧтисѧ творцꙋ̀ въ трⷪ҇цѣ.

Ра́дꙋйсѧ, нїко́лае, вели́кїй чꙋдотво́рче.

Бл҃года́ть да́ннꙋю тѝ ѿ бг҃а свѣ́дꙋщїи, ра́дꙋющесѧ твою̀ па́мѧть пра́зднꙋемъ по до́лгꙋ, пресла́вный ѻ҆́тче нїко́лае, и҆ къ чꙋ́дномꙋ застꙋпле́нїю твоемꙋ̀ вседꙋ́шнѡ притека́емъ. Пресла́вныхъ же твои́хъ дѣѧнїй, ꙗ҆́кѡ песка̀ морска́гѡ и҆ мно́жества ѕвѣ́зднагѡ и҆счестѝ не могꙋ́ще, недоꙋмѣ́нїемъ ѡ҆бъѧти бы́вше, вопіе́мъ къ бг҃ꙋ: А҆ллилꙋ́їа.

Пою́ще твоѧ̀ чꙋдеса̀, восхвалѧемъ тѧ̀, всехва́льне нїко́лае: въ тебѣ́ бо бг҃ъ въ трⷪ҇цѣ прославлѧемый ди́внѡ просла́висѧ, но а҆́ще и҆ попремно́гꙋ соста́влєнныѧ ѿ дꙋшѝ pалмы̀ и҆ пѣ́сни прино́симъ тѝ, чꙋдотво́рче ст҃ы́й, ничто́же твори́мъ ра́внѡ дарова́нїю чꙋде́съ твои́хъ, и҆́мже ᲂу҆дивлѧющесѧ вопіе́мъ къ тебѣ̀ такѡва́ѧ:

Ра́дꙋйсѧ, цр҃ѧ̀ ца́рствꙋющихъ и҆ гдⷭ҇а госпо́дствꙋющихъ слꙋжи́телю:

Ра́дꙋйсѧ, слꙋжи́телей є҆гѡ̀ нбⷭ҇ныхъ сожи́телю.

Ра́дꙋйсѧ, лю́демъ вѣ́рнымъ поможе́нїе:

Ра́дꙋйсѧ, ро́да хрⷭ҇тіа́нскагѡ возвыше́нїе.

Ра́дꙋйсѧ, побѣ́ды тезоимени́тый:

Ра́дꙋйсѧ, вѣнцено́сче наро́читый.

Ра́дꙋйсѧ, всѣхъ добродѣ́телей зерца́ло:

Ра́дꙋйсѧ, всѣхъ притека́ющихъ къ тебѣ̀ крѣ́пкое забра́ло.

Ра́дꙋйсѧ, по бз҃ѣ и҆ бцⷣѣ, всѐ на́ше ᲂу҆пова́нїе:

Ра́дꙋйсѧ, тѣле́съ на́шихъ здра́вїе, и҆ дꙋ́шъ сп҃се́нїе.

Ра́дꙋйсѧ, ꙗ҆́кѡ тобо́ю ѿ вѣ́чныѧ сме́рти свобожда́емсѧ:

Ра́дꙋйсѧ, ꙗ҆́кѡ тобо́ю безконе́чныѧ жи́зни сподоблѧемсѧ.

Ра́дꙋйсѧ, нїко́лае, вели́кїй чꙋдотво́рче.

Ѻ҆ прест҃ы́й и҆ пречꙋ́дный ѻ҆́тче нїко́лае, ᲂу҆тѣше́нїе всѣхъ скорбѧщихъ, ны́нѣшнее на́ше прїимѝ приноше́нїе, и҆ ѿ гее́нны и҆зба́витисѧ на́мъ гдⷭ҇а ᲂу҆молѝ, бг҃опрїѧтнымъ твои́мъ хода́тайствомъ, да съ тобо́ю воспѣва́емъ: А҆ллилꙋ́їа, а҆ллилꙋ́їа, а҆ллилꙋ́їа.

Се́й конда́къ глаго́ли три́жды.

И҆ па́ки:

А҆́ггла ѡ҆́бразомъ, земна́го сꙋ́ща є҆стество́мъ, ꙗвѝ тебѐ всеѧ̀ тва́ри созда́тель: бл҃гопло́днꙋю бо добро́тꙋ дꙋшѝ твоеѧ̀ прови́дѣвъ, пребл҃же́нне нїко́лае, наꙋчѝ всѣхъ вопи́ти тебѣ̀ си́це:

Ра́дꙋйсѧ, ѿ ᲂу҆тро́бы ма́тернїѧ ѡ҆чище́нный:

Ра́дꙋйсѧ, да́же до конца̀ ѡ҆сщ҃е́нный.

Ра́дꙋйсѧ, рожде́нїемъ свои́мъ роди́телей ᲂу҆диви́вый:

Ра́дꙋйсѧ, си́лꙋ дꙋше́внꙋю а҆́бїе по рождествѣ̀ ꙗ҆́кїивый.

Ра́дꙋйсѧ, са́де землѝ ѡ҆бѣтова́нїѧ:

Ра́дꙋйсѧ, цвѣ́те бжⷭ҇твеннагѡ сажде́нїѧ.

Ра́дꙋйсѧ, лозо̀ добродѣ́тельнаѧ віногра́да хрⷭ҇то́ва:

Ра́дꙋйсѧ, дре́во чꙋдото́чное раѧ̀ і҆и҃сова.

Ра́дꙋйсѧ, кріне ра́йскагѡ прозѧбе́нїѧ:

Ра́дꙋйсѧ, мѵ́ро хрⷭ҇то́ва бл҃гоꙋха́нїѧ.

Ра́дꙋйсѧ, ꙗ҆́кѡ тобо́ю ѿго́нитсѧ рыда́нїе:

Ра́дꙋйсѧ, ꙗ҆́кѡ тобо́ю прино́ситсѧ ра́дованїе.

Ра́дꙋйсѧ, нїко́лае, вели́кїй чꙋдотво́рче.

Возбра́нный чꙋдотво́рче, и҆ и҆зрѧдный ᲂу҆го́дниче хрⷭ҇то́въ, мірꙋ всемꙋ̀ и҆сточа́ѧй многоцѣ́нное млⷭ҇ти мѵ́ро, и҆ неисчерпа́емое чꙋде́съ мо́ре, восхвалѧю тѧ̀ любо́вїю, ст҃и́телю нїко́лае: ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧкихъ мѧ̀ бѣ́дъ свободѝ, да зовꙋ́ ти:

Ра́дꙋйсѧ, нїко́лае, вели́кїй чꙋдотво́рче.

Ѻ҆ всехва́льный и҆ всечтⷭ҇ны́й а҆рхїере́ю, вели́кїй чꙋдотво́рче, ст҃и́телю хрⷭ҇то́въ, ѻ҆́тче нїко́лае, человѣ́че бж҃їй и҆ вѣ́рный ра́бе, мꙋ́жꙋ жела́нїй, сосꙋ́де и҆збра́нный, крѣ́пкїй сто́лпе цр҃ко́вный, свѣти́льниче пресвѣ́тлый, ѕвѣздо̀ ѡ҆сїѧва́ющаѧ и҆ ѡ҆свѣща́ющаѧ всю̀ вселе́ннꙋю! Ты̀ є҆сѝ првⷣникъ, ꙗ҆́кѡ фініxъ процвѣты́й, насажде́нный во дво́рѣхъ гдⷭ҇а своегѡ̀: живы́й въ мѵ́рѣхъ, мѵ́ромъ ѡ҆бл҃гоꙋха́лъ є҆сѝ, и҆ мѵ́ро приснотекꙋ́щее бл҃года́ти бж҃їѧ и҆сточа́еши: твои́мъ ше́ствїемъ, прест҃ы́й ѻ҆́тче, мо́ре ѡ҆ст҃и́сѧ, є҆гда̀ многочꙋдє́сныѧ твоѧ̀ мо́щи ше́ствовахꙋ во гра́дъ ба́рскїй, ѿ восто́ка до за́пада хвали́ти и҆́мѧ гдⷭ҇не. ѻ҆ преизѧщный и҆ преди́вный чꙋдотво́рче, ско́рый помо́щниче, те́плый застꙋ́пниче, па́стырю предо́брый, сп҃са́ѧй слове́сное ста́до ѿ всѧкихъ бѣ́дъ! тебѐ прославлѧемъ и҆ тебѐ велича́емъ, ꙗ҆́кѡ наде́ждꙋ всѣхъ хрⷭ҇тіа́нъ, и҆сто́чника чꙋде́съ, защи́тителѧ вѣ́рныхъ, премꙋ́драго ᲂу҆чи́телѧ, а҆́лчꙋщихъ корми́телѧ, пла́чꙋщихъ весе́лїе, наги́хъ ѡ҆дѣѧнїе, болѧщихъ врача̀, по мо́рю пла́вающихъ ᲂу҆пра́вителѧ, плѣ́нникѡвъ свободи́телѧ, вдѡ́въ и҆ сиро́тъ пита́телѧ и҆ застꙋ́пника, цѣломꙋ́дрїѧ храни́телѧ, младе́нцєвъ кро́ткаго наказа́телѧ, ста́рыхъ ᲂу҆крѣпле́нїе, по́стникѡвъ наста́вника, трꙋжда́ющихсѧ ᲂу҆покое́нїе, ни́щихъ и҆ ᲂу҆бо́гихъ и҆зъoби́льное бога́тство. Оу҆слы́ши на́съ молѧщихсѧ тебѣ̀ и҆ прибѣга́ющихъ подъ кро́въ тво́й, ꙗвѝ предста́тельство твоѐ ѡ҆ на́съ къ вы́шнемꙋ, и҆ и҆схода́тайствꙋй твои́ми бг҃опрїѧтными мл҃твами всѧ̀ полє́знаѧ ко сп҃се́нїю дꙋ́шъ и҆ тѣле́съ на́шихъ: сохранѝ ст҃ꙋ́ю ѡ҆би́тель сїю̀ [и҆лѝ хра́мъ се́й] всѧкїй гра́дъ и҆ ве́сь, и҆ всѧкꙋю странꙋ̀ хрⷭ҇тіа́нскꙋю, и҆ лю́ди живꙋ́щыѧ, ѿ всѧкагѡ ѡ҆ѕлобле́нїѧ по́мощїю твое́ю. Вѣ́мы бо, вѣ́мы, ꙗ҆́кѡ мно́гѡ мо́жетъ мл҃тва првⷣнагѡ, поспѣшествꙋ́ющаѧ во бл҃го́е: тебе́ же првⷣнаго, по пребл҃гослове́ннѣй дв҃ѣ мр҃їи, предста́телѧ ко всемлⷭ҇тивомꙋ бг҃ꙋ и҆́мамы, и҆ ко твоемꙋ̀, пребл҃гій ѻ҆́тче, те́пломꙋ хода́тайствꙋ и҆ застꙋпле́нїю смире́ннѡ притека́емъ. Ты̀ на́съ соблюдѝ, ꙗ҆́кѡ бо́дрый и҆ до́брый па́стырь, ѿ всѧкихъ врагѡ́въ, гꙋби́тельства, трꙋ́са, гра́да, гла́да, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ, и҆ во всѣхъ бѣда́хъ и҆ ско́рбехъ на́шихъ подава́й на́мъ рꙋ́кꙋ по́мощи, и҆ ѿве́рзи двє́ри милосе́рдїѧ бж҃їѧ: поне́же недосто́йни є҆смы̀ зрѣ́ти высотꙋ̀ нбⷭ҇нꙋю, ѿ мно́жества непра́вдъ на́шихъ: свѧзани є҆смы̀ ᲂу҆́зами грѣхо́вными, и҆ николи́же во́ли созда́телѧ на́шегѡ сотвори́хомъ, ни сохрани́хомъ повелѣ́нїй є҆гѡ̀. Тѣ́мже преклонѧемъ колѣ́на сокрꙋше́ннагѡ и҆ смире́ннагѡ се́рдца на́шегѡ къ зижди́телю своемꙋ̀, и҆ твоегѡ̀ ѻ҆те́ческагѡ застꙋпле́нїѧ къ немꙋ̀ про́симъ: помозѝ на́мъ, ᲂу҆го́дниче бж҃їй, да не поги́бнемъ со беззакѡ́нїи на́шими: и҆зба́ви на́съ ѿ всѧкагѡ ѕла̀ и҆ ѿ всѧкїѧ ве́щи сопроти́вныѧ, ᲂу҆пра́ви ᲂу҆́мъ на́шъ, и҆ ᲂу҆крѣпѝ се́рдце на́ше въ пра́вой вѣ́рѣ, въ не́йже твои́мъ предста́тельствомъ и҆ хода́тайствомъ, ни ра́нами, ни преще́нїемъ, ни мо́ромъ, ни ко́имъ гнѣ́вомъ ѿ созда́телѧ своегѡ̀ ᲂу҆ма́лени бꙋ́демъ, но ми́рное здѣ̀ поживе́мъ житіѐ, и҆ да сподо́бимсѧ ви́дѣти бл҃га̑ѧ на землѝ живы́хъ, сла́вѧще ѻ҆ц҃а̀ и҆ сн҃а и҆ ст҃а́го дх҃а, є҆ди́наго въ трⷪ҇цѣ сла́вимаго и҆ покланѧемаго бг҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ѻ҆ всест҃ы́й нїко́лае, ᲂу҆го́дниче преизрѧдный гдⷭ҇нь, те́плый на́шъ застꙋ́пниче, и҆ вездѣ̀ въ ско́рбехъ ско́рый помо́щниче! Помозѝ мнѣ̀ грѣ́шномꙋ и҆ ᲂу҆ны́ломꙋ, въ настоѧщемъ се́мъ житїѝ, ᲂу҆молѝ гдⷭ҇а бг҃а дарова́ти мѝ ѡ҆ставле́нїе всѣхъ мои́хъ грѣхѡ́въ, є҆ли́кѡ согрѣши́хъ ѿ ю҆́ности моеѧ̀, во все́мъ житїѝ мое́мъ, дѣ́ломъ, сло́вомъ, помышле́нїемъ и҆ всѣ́ми мои́ми чꙋ́вствы: и҆ во и҆схо́дѣ дꙋшѝ моеѧ̀ помози́ ми ѻ҆каѧнномꙋ, ᲂу҆молѝ гдⷭ҇а бг҃а всеѧ̀ тва́ри содѣ́телѧ, и҆зба́вити мѧ̀ воздꙋ́шныхъ мыта́рствъ и҆ вѣ́чнагѡ мꙋче́нїѧ: да всегда̀ прославлѧю ѻ҆ц҃а̀, и҆ сн҃а, и҆ ст҃а́го дх҃а, и҆ твоѐ млⷭ҇тивное предста́тельство, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѻ҆ всебл҃гій ѻ҆́тче нїко́лае, па́стырю и҆ ᲂу҆чи́телю всѣхъ, вѣ́рою притека́ющихъ ко твоемꙋ̀ застꙋпле́нїю и҆ те́плою мл҃твою тебѐ призыва́ющихъ! Ско́рѡ потщи́сѧ и҆ и҆зба́ви хрⷭ҇то́во ста́до ѿ волкѡ́въ гꙋбѧщихъ є҆́: и҆ всѧкꙋ странꙋ̀ хрⷭ҇тіа́нскꙋю ѡ҆градѝ и҆ сохранѝ ст҃ы́ми твои́ми мл҃твами ѿ мірска́гѡ мѧте́жа, трꙋ́са, наше́ствїѧ и҆ноплеме́нникѡвъ и҆ междоꙋсо́бныѧ бра́ни, ѿ гла́да, пото́па, ѻ҆гнѧ̀, меча̀ и҆ внеза́пныѧ сме́рти. И҆ ꙗ҆́коже поми́ловалъ є҆сѝ тріе́хъ мꙋже́й въ темни́цѣ сѣдѧщихъ, и҆ и҆зба́вилъ є҆сѝ и҆́хъ ѿ царе́ва гнѣ́ва и҆ посѣче́нїѧ ме́чнагѡ: та́кѡ поми́лꙋй и҆ менѐ, ᲂу҆мо́мъ, сло́вомъ и҆ дѣ́ломъ во тьмѣ̀ грѣхѡ́въ сꙋ́ща, и҆ и҆зба́ви мѧ̀ ѿ гнѣ́ва бж҃їѧ и҆ вѣ́чныѧ ка́зни: ꙗ҆́кѡ да твои́мъ хода́тайствомъ и҆ по́мощїю, свои́мъ же милосе́рдїемъ и҆ бл҃года́тїю, хрⷭ҇то́съ бг҃ъ ти́хое и҆ безгрѣ́шное житіѐ да́стъ мѝ пожи́ти въ вѣ́цѣ се́мъ, и҆ и҆зба́витъ мѧ̀ ѿ шꙋ́їѧгѡ стоѧнїѧ, сподо́битъ же десна́гѡ со всѣ́ми ст҃ы́ми во вѣ́ки вѣкѡ́въ. А҆ми́нь.