Тропарь преподобному Димитрию, глас 1
Свы́ше от Бо́га, преподо́бне,/ благода́ть прия́л еси́ духо́вную,/ и от Него́ у́бо позна́лся еси́, блаже́нне,/ Того́ ра́ди и ты ду́хом позна́л еси́ лу́чшая Его́,/ бу́дущаго ве́ка пребыва́ние,/ и по́стнически испыта́вся во свои́х оби́телех./ И ны́не со а́нгели ликовству́я,/ Спа́су всех за ны моли́ся, свя́те Дими́трие, да вси вопие́м:/ Сла́ва Да́вшему ти кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.
Тропарь преподобному Димитрию, глас 4
Возсия́ днесь, я́ко со́лнце,/ пречестны́й о́браз священноле́пнаго твоего́ подо́бия,/ па́че со́лнца луча́ми чуде́с твои́х всех озаря́я,/ тьму бесо́вскую без ве́сти творя́,/ его́же ра́достно срета́ху,/ духо́вныя ли́ки соста́вльше,/ непреста́нно вопие́м ти:/ Дими́трие, о́тче наш, моли́ Спа́са всех/ сохрани́ти град твой и страну́ на́шу,/ ста́ду твоему́ спасе́ние подава́я// и ве́лию ми́лость.
Ин тропарь преподобному Димитрию, глас 1
Свы́ше от Бо́га, преподо́бне,/ благода́ть прия́л еси́, Дими́трие пресла́вне,/ и Того́ си́лою укрепля́ем,/ Ева́нгельски ходи́ти изво́лил еси́,/ отону́ду же и от Христа́ возме́здие трудо́в обре́те, всеблаже́нне,/ Его́же моли́// спасти́ся душа́м на́шим.
Ин тропарь праведной Феодоре, глас 8
Правосла́вия красото́, благоче́стия тверды́не/ и защи́тнице Це́ркве Христо́вы,/ свяще́нных ико́н све́тлое устрое́ние,/ цари́це честна́я,/ к Бо́гу моли́твами твои́ми/ свободи́ от ересе́й славосло́вящих тя́,// свы́ше при́сно подаю́щи грехо́в разреше́ние.
Кондак преподобному Димитрию , глас 8
От ю́ности, преподо́бне, крест твой взе́м, Христу́ после́довал еси́,/ в моли́твах и поще́ниих, во бде́ниих же и злострада́ниих пло́ть твою́ изнуря́я./ Те́мже и Всеви́дящее О́ко твоя́ труды́ ви́дев,/ чудесы́ тя прославля́ет, и всех зва́ти тебе науча́ет:// ра́дуйся, преподо́бне о́тче Дими́трие, по́стников удобре́ние.
Кондак преподобному Димитрию , глас 8
Христа́ еди́наго в жи́зни сей во след идти́ возжела́л еси́/ и, Того́ любо́вию земна́я отри́нув, премину́в Небе́сными,/ с ли́ки А́нгел водворя́яся, неотсту́пно предстои́ши Бо́гови,/ тем и ны́не пресвято́му твоему́ о́бразу сре́тения пра́здник ра́достно сотворя́юще,/ от неду́г исцеле́ние прие́млем, благода́рно вопию́ще:// ра́дуйся, преподо́бне о́тче Дими́трие, по́стников удобре́ние.
Ин кондак преподобному Димитрию , глас 3
Жезло́м, свя́те Дими́трие, от Бо́га да́нным ти,/ лю́ди своя́ упасе́ на па́житех зако́на живоно́сна,/ зве́ря же неви́димаго шата́ние сокруши́ под но́зе тебе́ пою́щих,// я́ко да в беда́х тя те́пла предста́теля и́мамы.
Кондак праведной Феодоре , глас 3
Благоче́стия цветы́ украси́вшися, свята́я,/ и увенча́нная диади́мою от руки́ Бо́жией, Феодо́ро,/ побо́рница це́ркви всея́ показа́лася еси́,/ воздви́гши поклоне́ние Христо́ве ико́не несумне́нно и святы́х,// с ни́миже сопричла́ся еси́ к небе́сному жре́бию.
